Posted By :  Admin1

ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസിൽ (എയിംസ്) നിന്ന് പീഡിയാട്രിക് എമർജൻസി മെഡിസിനിൽ ഡോക്ടർ ഓഫ് മെഡിസിൻ (ഡി.എം) ബിരുദം നേടിയ കേരളത്തിൽ നിന്നുള്ള ആദ്യ വ്യക്തിയായി ഡോ. സമ്രീൻ യൂസഫ് മാറി. ഇന്ത്യയിലെ പീഡിയാട്രിക് എമർജൻസി മെഡിസിൻ മേഖലയിൽ ഒരു നാഴികക്കല്ല് കുറിക്കുന്ന സുപ്രധാന നേട്ടമാണിത്. റായ്‌പൂറിലെ എയിംസിൽ നിന്നുമാണ് ഡോ. സമ്രീൻ യൂസഫ് പീഡിയാട്രിക് എമർജൻസി മെഡിസിനിൽ ഡി.എം പൂർത്തിയാക്കിയത്. നിലവിൽ റായിപൂർ എയിംസിൽ പ്രത്യേകമായി ഓഫർ ചെയ്യുന്ന ഒരു സബ് സ്പെഷ്യാലിറ്റി പ്രോഗ്രാമാണ് ഡി.എം ഇൻ പീഡിയാട്രിക് എമർജൻസി മെഡിസിൻ. രാജ്യത്തുടനീളം ഇത്തരം പ്രത്യേക പരിപാടികളുടെ പരിമിതമായ ലഭ്യത ഡോ. സമ്രീൻ യൂസഫിൻ്റെ നേട്ടത്തെ കൂടുതൽ ശ്രദ്ധേയമാക്കുന്നു. കോഴിക്കോട് സ്വദേശിനിയായ സമ്രീൻ, പ്രശസ്ത തൊറാസിക് സർജൻ ഡോ. നാസർ യൂസഫിൻ്റെയും നർഗീസിൻ്റെയും മകളാണ്. കോഴിക്കോട് ഭാരതീയ വിദ്യാഭവനിൽ സ്കൂൾ വിദ്യാഭ്യാസം പൂർത്തിയാക്കിയ സമ്രീൻ മൈസൂരിലെ സർക്കാർ മെഡിക്കൽ കോളേജിൽ നിന്ന് എം.ബി.ബി.എസ് ബിരുദം നേടി. ഡി.എം കരസ്ഥമാക്കുന്നതിന് മുൻപ്, റായ്‌പൂറിലെ ഗവൺമെന്റ് മെഡിക്കൽ കോളേജിൽ നിന്ന് (ഡോ. ഭീം റാവു അംബേദ്കർ മെഡിക്കൽ കോളേജ്) പീഡിയാട്രിക്സിൽ എം.ഡി നേടുകയും ചെയ്‌തു സമ്രീൻ. ഡോ. സമ്രീനിൻ്റെ നേട്ടം എല്ലാ മെഡിക്കൽ പ്രൊഫഷണലുകൾക്കും ഒരു പ്രചോദനമാണ്, പ്രത്യേകിച്ച് പ്രത്യേക മേഖലകളിൽ വൈദഗ്ദ്ധ്യം നേടാൻ ആഗ്രഹിക്കുന്നവർക്ക്. ഡോ. സമ്രീനിൻ്റെ നിശ്ചയദാർഢ്യവും അർപ്പണബോധവും മെഡിക്കൽ മേഖലയിൽ, പ്രത്യേകിച്ച് പീഡിയാട്രിക് എമർജൻസി മെഡിസിൻ മേഖലയിൽ കാര്യമായ സംഭാവന നൽകാൻ ആഗ്രഹിക്കുന്നവർക്ക് ഒരു വലിയ പ്രചോദനം തന്നെയാണ്.