Posted By :  Admin1

നാഗ്പ്പൂർ(മഹാരാഷ്ട്ര): രാജ്യത്തെ ഡോക്ടർമാർക്ക് ലോകമെമ്പാടും ആദരവ് ലഭിക്കുന്നുണ്ടെന്നും യു.കെയിലെയും യു.എസിലെയും മികച്ച 10 ഡോക്ടർമാരിൽ ആറ് പേരും ഇന്ത്യൻ വംശജരാണെന്നും കേന്ദ്രമന്ത്രി നിതിൻ ഗഡ്‌കാരി പറഞ്ഞു. താങ്ങാനാവുന്ന ചികിത്സയും വിലകുറഞ്ഞ മരുന്നുകളുടെ ലഭ്യത ഉറപ്പാക്കലും ഏറെ നിർണായകമാണെന്ന് അദ്ദേഹം പറഞ്ഞു. അസ്സോസിയേഷൻ ഓഫ് ക്യൂട്ടേനിയസ് സർജൻസിൻ്റെ ദേശീയ സമ്മേളനത്തിൽ സംസാരിക്കുകയായിരുന്നു ഗഡ്‌കാരി. ശസ്ത്രക്രിയ, സ്‌കിൻ ഹെൽത്ത് എന്നിവയുടെ പ്രോത്സാഹനത്തിനും പുരോഗതിക്കും വേണ്ടി പ്രവർത്തിക്കുന്ന ഒരു സംഘടനയാണ് അസോസിയേഷൻ ഓഫ് ക്യൂട്ടേനിയസ് സർജൻസ്. രാജ്യത്ത് മെഡിക്കൽ കോളേജുകളുടെയും എയിംസിൻ്റെയും(ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ്) കാമ്പസുകളുടെ എണ്ണം വർധിപ്പിക്കേണ്ടതിൻ്റെ ആവശ്യകത നാഗ്പൂരിൽ നിന്നുള്ള ലോക്‌സഭാ എം.പി എടുത്തു പറഞ്ഞു. രാജ്യത്തിന് കൂടുതൽ ഡോക്ടർമാരെ ആവശ്യമാണെന്നും ഡിമാൻഡ്-സപ്ലൈ വിടവ് നികത്താൻ സർക്കാർ ഡോക്ടർമാരുടെ വിരമിക്കൽ പ്രായം വർദ്ധിപ്പിക്കണമെന്നും ഗഡ്‌കാരി പറഞ്ഞു. അദ്ദേഹം മെഡിക്കൽ സയൻസിൽ പബ്ലിക്-പ്രൈവറ്റ് പങ്കാളിത്തത്തിന് ആഹ്വാനം ചെയ്യുകയും മെഡിക്കൽ മേഖലയിൽ ഗുണപരമായ വിദ്യാഭ്യാസം നൽകുന്നതിന് ഊന്നൽ നൽകുകയും ചെയ്തു. മെഡിക്കൽ സയൻസിൽ ഗവേഷണത്തിന് വലിയ സാധ്യതകളുണ്ടെന്നും കേന്ദ്രമന്ത്രി പറഞ്ഞു. ആരോഗ്യമേഖലയിൽ സ്വകാര്യ, സർക്കാർ സ്ഥാപനങ്ങളിൽ നിന്നുള്ള ഗുണമേന്മയുള്ളതും നിക്ഷേപവുമായുള്ള നൂതനമായ സമീപനമാണ് ആവശ്യമെന്നും അദ്ദേഹം അറിയിച്ചു. പാവപ്പെട്ടവർക്ക് താങ്ങാനാവുന്ന ചികിത്സാരീതി എങ്ങനെ ലഭ്യമാക്കാൻ കഴിയുമെന്നതിൽ ശ്രദ്ധ കേന്ദ്രീകരിക്കണമെന്ന് ഗഡ്‌കാരി കോൺഫറൻസിൽ പങ്കെടുത്ത ഡോക്ടർമാരോട് ആവശ്യപ്പെടുകയും ചെയ്‌തു.