Posted By :  Admin1

ഡൽഹി: റെസിഡൻഷ്യൽ കാമ്പസുകളിൽ ഇനി മുതൽ മുഴുവൻ സമയവും ഇലക്ട്രിക് സ്റ്റാഫ് കാറുകൾ ലഭ്യമാക്കുമെന്ന് ഡൽഹിയിലെ ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ് (എയിംസ്). രോഗി പരിചരണം വളരെ വേഗത്തിലും എളുപ്പത്തിലും നടത്താൻ വേണ്ടിയാണ് ഈ 24 X 7 ഇലക്ട്രിക് സ്റ്റാഫ് കാറുകളുടെ സേവനം ഉപയോഗിക്കുന്നത്. എയിംസ് ഡൽഹി ഡയറക്ടറായ ഡോ. എം. ശ്രീനിവാസ് ആശുപത്രി ജീവനക്കാരുടെ ആവശ്യങ്ങളും ആശങ്കകളും അറിയാൻ വേണ്ടി നിരന്തരം ജീവനക്കാരുമായി ചർച്ചകൾ നടത്താറുണ്ടായിരുന്നു. ആയുർ വിജ്ഞാന് നഗർ, കിദ്വായ് നഗർ, ഏഷ്യാഡ് വില്ലേജ്, അൻസാരി നഗർ വെസ്റ്റ് എന്നിവിടങ്ങളിൽ താമസിക്കുന്ന ക്ലിനിക്കൽ ടീം അംഗങ്ങളെ ബാധിക്കുന്ന ഒരു പ്രശ്‌നമാണ് ഈ ചർച്ചകളിലൂടെ മനസ്സിലാക്കാൻ സാധിച്ചത്. ഈ പ്രദേശങ്ങളിൽ താമസിക്കുന്ന ക്ലിനിക്കൽ ടീം അംഗങ്ങൾക്ക് അടിയന്തിര രോഗി പരിചരണ ചുമതലകൾക്കായി പ്രധാന കാമ്പസിലേക്ക് എല്ലായ്‌പ്പോഴും കൃത്യമായി എത്താൻ സാധിക്കുന്നില്ല. മികച്ച ഗതാഗതം ലഭിക്കാത്തതാണ് ഇതിൻ്റെ പ്രധാനപ്പെട്ട കാരണം. ഈ പ്രശ്‌നത്തിന് പരിഹാരം കാണാനാണ് എയിംസ് അധികൃതർ ഇലക്ട്രിക്ക് സ്റ്റാഫ് കാറുകൾ മുഴുവൻ സമയവും ലഭ്യമാക്കാൻ തീരുമാനിച്ചത്. "ആയുർ വിജ്ഞാൻ നഗർ, കിദ്വായ് നഗർ, ഏഷ്യാഡ് വില്ലേജ്, അൻസാരി നഗർ വെസ്റ്റ് എന്നീ റെസിഡൻഷ്യൽ കാമ്പസുകളിൽ 24×7 നിരക്കിൽ  ഇലക്‌ട്രിക് സ്റ്റാഫ് കാറുകൾ ഇനി മുതൽ ലഭ്യമാക്കുന്ന കാര്യം വളരെ സന്തോഷത്തോട് കൂടി ഞങ്ങൾ അറിയിക്കുന്നു." ആശുപത്രി വൃത്തങ്ങൾ പറഞ്ഞു